Груевски: Голем успех за Македонија, влеговме во топ 10 држави во светот за водење на бизнис

Десетто место во светот на Македонија, што го објави пред малку Светската банка на нејзината листа Дуинг бизнис, е одлична вест за Македонија, вели лидерот на ВМРО-ДПМНЕ Никола Груевски, кој во моментов е во политичка посета на Велика Британија.

-Постојат многу малку работи во светот во коишто Македонија е на десеттото место, во најдобрите десет. Едно од тие од денеска и официјално, не според кој било, туку според Светската банка, е најдобра бизнис клима мерејќи ги сите земји во светот. Македонија е десетта во светот и на петто место во Европа. Пред нас во Европа се само четири земји: Велика Британија, Шведска, Норвешка и Данска. Нависитна малку работи можат да се најдат каде што сме во првите 10 во светот, а ова е една од поважните работи, затоа што оваа работа е предуслов за отворање на нови работни места а со тоа и зголемување на стандардот на населението, вели Груевски.

Тој додава дека е многу радосен бидејќи тоа е резултат на нивната голема работа и труд во изминатите месеци и години.

-Да потсетам, тргнавме од 94-то место во 2006 година кога бевме на една прилично лоша позиција, секоја година напредувавме со нови мерки и со нови работи и реформи кои што направиа и кои што им го олеснуваат работењето и животот на компаниите во Македонија. Ние не ги делиме дали се домашни или се странски и за сите се трудиме да создадеме што е можно подобри услови и тоа дава резултат секоја година. Секоја година растеме на листата, оваа година дојдовме на 10-то а лани бевме на 12-то, рече Груевски.

На ова многу се работеше, подвлекува Груевски, вложен е голем труд, енергија, време и работа за да се постигнат овие значајни резултати.

-Ова ќе биде одлична препорака за многу инвеститори во светот да дојдат во Македонија и за оние кои што до сега слушнале но немале многу информации. 10-то место што ни го дава Светска Банка во светот и 5-то во Европа кажува многу, заклучува Груевски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.