Буфон е најзаслужен за трите бода на Јуве, Лестер продолжува да доминира во ЛШ (видео)

Актуелниот англиски шампион екипата на Лестер во деби настапот во Лигата на шампионите продолжува да импресионира иако слабо ја започна новата сезона во Англија. Избраниците на тренерот Клаудио Раниери стигнаа до нова победа и сега по три кола имаат максимален ефект од девет бодови.

Лисиците“ на домашен терен со 1-0 славеа над дански Копенхаген со гол уште во првото полувреме на алжирскиот интернационалец Ријад Махрез по додавање на неговиот сонародник Слимани. По една нафрлена топка двајцата Алжирци искомбинираа, а Марез едноставно не можеше да погреши затоа што се најде пред празниот агол од голот на гостинот и погоди на елегантен начин.

Јувентус ја забележа и втората победа во рамките од групата Ф од Лигата на шампионите, стигнувајќи до значајни три бода на жешкиот терен во Лион. „Старата дама“ триумфираше со 0-1 со погодокот на Куардадо, но херој на овој натпревар е Џанлуиџи Буфон.

Искусниот голман најпрвин во првото полувреме му одбрани пенал на Лаказет, на стартот од вториот дел со извонредна рефлексна интервенција повторно спречи водство на Лион, овозможувајќи му на Квардадо потоа да го постигне голот за победа. Трите бода се уште поголеми ако се знае дека до нив се стигна со фудбалер помалку на теренот, откако Лемина на триесетина минути до крајот доби црвен картон.

Реал Мадрид ја оправда фаворитската улога на дуелот со Легија, триумфирајќи со 5-1. Интересно, од петте гола за Реал ниту едден не беше дело на Кристијано Роналдо откако мрежата на гостите ја затресоа Бејл, Асенсио, Лукас Васкез и Мората, а еден погодок беше автогол.

До огромни три бода стигна тимот на Борусија Дортмунд, кој триумфираше со 1-2 во Лисабон против Спортинг. Обамејанг и Вајгл беа стрелци на головите за „милионерите“, кои остануваат рамо до рамо со Реал во битката за првото место во групата.

ГРУПА Е:

ЦСКА – Монако 1-1, Баер Л. – Тотенхем 0-0.
Табела: Монако 5, Тотенхем 4, Баер Л. 3, ЦСКА Москва 2.

ГРУПА Ф:

Реал М. – Легија 5-1, Спортинг – Борусија Д. 1-2.
Табела: Борусија Д. 7, Реал Мадрид 7, Спортинг 3, Легија 0.

ГРУПА Г:

Лестер – Копанхаген 1-0, Бриж – Порто 1-2.
Табела: Лестер 9, Копенхаген 4, Порто 4, Бриж 0.

ГРУПА Х:

Динамо З. – Севилја 0-1, Лион – Јувентус 0-1.
Табела: Јувентус 7, Севилја 7, Лион 3, Динамо 0.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.