Австрискиот министер за надворешни работи Себастијан Курц во обраќање пред Генералното собрание на Обединетите нации во Њујорк предупреди на опасноста од радикализација и насилен екстремизам во глобализираниот свет.
Тој во своето обраќање нагласи дека верскиот екстремизам не е закана само во регионите во кои постојат конфликти, туку и во „срцето на нашите општества“. Курц смета дека безбедноста и стабилноста можат да бидат постигнати само со мултилатерални напори. Тој укажа и дека изминатите години е видлива драматична закана за безбедноста, човековите права и основите права во сите сфери на животот, на пример преку влијанието на верскиот екстремизам врз младите. Како пример тој наведе десетици илјади странски борци во Исламска држава, меѓу кои повеќе од пет илјади од Еврпската унија, а 300 од нив во Австрија. -Уништувањето на исламистичките групации во земјите како што се Сирија, Ирак или Либија е најважната мерка во борбата против радикализацијата, а доколку тоа не успее тогаш во Европа или на кое било друго место во светот нема да постојат безбедни места – додаде австрискиот министер за надворешни работи.
Курц во своето обраќање се заложи и за доследно нуклеарно разоружување, како и за забрана на експлозивни оружја во населените подрачја. Употребата на такво оружје во градовите или во други урбани зони погодува 90 отсто од цивилното население, рече тој наведувајќи ја Сирија како пример.
-Разорувањето на домовите, болниците или училиштата го принудува населението на бегство – предупреди Курц.
Австрија, како што рече е за правно обврзувачка забрана на нуклеарното оружје од 2017 година, а во врска со тоа наскоро ќе поднесе соодветна резолуција.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
