Општина Гази Баба повикува доброволци на помош, граѓани ги отвораат домовите за онесреќените

Општина Гази Баба апелира до сите граѓани на Република Македонија, кои имаат желба, волја, време и простор, да се вклучат како доброволци во акциите за справување со последиците од обилните врнежи и катастрофалното невреме што ја зафати оваа локална самоуправа.

Граѓаните кои сакаат да се вклучат во акциите за чистење на теренот, може да се пријават во општината Гази Баба на телефонскиот број 02/322-6655. Можат и во три временски интервали, во 10, 13 и 17 часот да дојдат во просториите на општината, на улица „Архимедова“ бр.2, од каде организирано ќе бидат однесени до населените места каде се спроведуваат акциите.

Пожелно е граѓаните кои ќе се вклучат во акциите, доколку се во можност, да понесат со себе и определен соодветен алат, кој ќе им помогне во работата.

– Граѓани на Скопје и на Македонија, повеќе од добредојдени сте да помогнете да се справиме со заеднички сили со оваа природна непогода, порачуваат од општина Гази Баба.

Граѓаните ја покажуваат хуманоста на различни начини. Покрај донациите, или со работа во Гази Баба, дел од граѓаните кои имаат можности ги отворија своите врати за сместување на несреќните семејства од поплавените региони.

Еден од тие е и сопственик на хотел во Скопје, кој што несебично понуди да ги прими оние кои немаат каде да се сместат.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.