Леброн Џејмс ја доби наградата за најкорисен кошаркар во НБА, а славјето му го расипаа играчите на Чикаго, во првиот полуфинален меч од источната коференција . Тие направија сензација и го победија актуелниот шампион Мајами, на негов терен со 93-86.
Леброн беше најефикасен кај Мајами со 24 поени, имаше и 8 скока и 7 асистенции, но немаше расположени соиграчи. Само уште Двејн Вејд од десетмината домашни кошаркари имаше двоцифрен ефект во поени, 14, што доведе до пораз на актуелниот првак.
Чикаго е сѐ поопасен како што одминува плејофот иако поради повреди Булс игра десеткуван. Главниот адут Дерек Роуз не им игра цела сезона, а во првата рунда се повреди и Луол Денг, двајца кошаркари што се стандардни членови на првата петорка. Сепак, биковите играат храбро и изненадувачки добро, па најпрво во мајсторката од првото коло на гостински терен го елиминираа Бруклин, а сега го победија и шампионот на стартот од полуфиналната серија до 4 победи. Нејт Робинсон ја презеде улогата на Роуз и игра импресивно, а вистинско откровение е Џими Батлер, кој го менува Денг. Тој даде 21 поен, со 14 скока и беше силен адут за Булс, заедно со Робинсон, кој беше најефикасен на мечот со 27 поени. Патем, тој одлично ги разигруваше соиграчите и прокнижи 9 асистенции. Двоен ефект оствари Жоаким Ноа со 13 поени и 11 скока. Тактиката на Чикаго да се неутрализираат соиграчите на Леброн потполно успеа и тие заслужено водат со 1-0. Следниот меч повторно ќе се игра во Мајами.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
