Груевски на чело на партиската делегација во Брисел: Македонската интеграција е возможна ако се санираат штетите што ги нанесе опозицијата

Делегација на најголемата македонска политичка партија ВМРО ­ДПМНЕ, предводена од претседателот на партијата Никола Груевски, денеска ја започна дводневната работна посета на Брисел, каде делегацијата остварува и ќе оствари голем број средби со високи претставници на матичната европска партија, Европската народна партија (ЕПП), како и со други европски политичари.

Лидерот на ВМРО-ДПМНЕ заедно со министрите за надворешни работи и за здравство Никола Попоски и Никола Тодоров, како и со пратениците Александар Николоски и Владимир Ѓорчев, денеска во Европскиот парламент во Брисел се сретна со европратениците Маријана Петир, Милан Звер и Едвард Кукан, како и со германскиот федерален министер во Владата на Ангела Меркел за храна и земјоделство од Баварија, Кристијан Шмит.

Во изјава за МИА по средбите, Груевски истакна дека оваа дводневна посета е партиска посета и е во контекст на евроатлантските интеграции на Република Македонија, како и за санирање на штетите по македонската држава настанати од политичката криза, што според него, во земјата ја предизвика опозициската СДСМ. ­

–Средбите со европските претставници што ги имав денеска поминаа одлично. Ние сме дојдени тука во партиска посета. Разговорите што денеска и утре ќе ги имам со повеќемина во Брисел се во контекст на евроатлантските интеграции на Македонија и за намалување на штетите од политичката криза во Република Македонија, а во однос на нашите евроатлантски интеграции. Ние сме дојдени да се видиме со повеќе пријатели на Македонија и пријатели на ВМРО­ ДПМНЕ. Со дел од нив имавме денеска средби, а продолжуваме и во текот на утрешниот ден, така што ќе имаме поголем број средби на кои што разменуваме различни информации, мислења и ставови и секакви други прашања поврзани со евроатлантските интеграции на Македонија. Но, како што реков, разговаравме и за намалувањето на штетите од политичката криза предизвикана од опозицијата во земјата, а во поглед на македонските евроатлантските интеграции – изјави Груевски.

Во текот на утрешниот ден, партиската делегација на ВМРО­ ДПМНЕ предводена од Никола Груевски во Брисел, исто така, има набиена агенда според која се очекува дузина средби со високи политички претставници и дипломати од Европската унија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.