Шестмина убиени во Казахстан при престрелка меѓу радикални исламисти и полицијата (Видео)

Најмалку шест лица се убиени денеска во вооружен напад врз две продавници за оружје и воена база во западниот казахстански град Актобе.
Меѓу жртвите се тројца од напаѓачите.

Според портпаролот на Министерството за внатрешни работи Алмас Садубаев напаѓачите се приврзаници на „нетрадиционални религиозни трендови” – како што ги нарекуваат во Казахстан радикалните исламисти.
Непознати лица денеска попладне нападнаа две продавници за оружје, од кои едната се наоѓала на територијата на база на Националната гарда.

Убиен е еден продавач. Другите жртви се еден офицер и еден полицаец, кои се обидувале да го одбијат нападот. Девет војници повредени.
Еден од напаѓачите е уапсен, тројца се убиени, а неколкумина успеале да избегаат и по нив се трага, прецизира Садубаев. Во Актобе е воведен режим на антитерористичка операција.

Населбата каде е извршен нападот е целосно отцепена. Јавниот транспорт е запрен, се врши евакуација на местата каде што би можеле да се соберат поголем број луѓе. Според локалниот весник „Опсег” напаѓачите биле на возраст од околу 20 години и извршиле напад и на полициска станица во Актобе.

Од пред извесно време Казахстан, каде поголемиот дел од населението се муслимани, се жали од ширењето на радикалниот ислам во земјата, која по распадот на СССР се обидува да изгради секуларна држава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.