Ново големо финале за „кралот“, трета среќа за Кливленд (видео)

Ново финале за Леброн Џејмс. Шести пат некрунисаниот кошаркарски крал ќе се бори за прстен, откако синоќа во шестиот натпревар со Кливленд го совладаа Торонто со 113-87 и со конечни 4-2 се пласираа во големото финале.

Веќе го има освоено, но не во родниот Охајо (2 титули со Мајами). Кливленд чека на шампионската титула практично од кога постои, а ова ќе им биде нова шанса.

Синоќа во Торонто немаше дилеми, Леброн со 33 поени и 11 скокови одговори на 35-те поени на Кајл Лори. Кајри Ирвинг постигна 30, а Лов 20 поени. Сега им следи одмор, ќе го чекаат победникот од западната финална серија меѓу Голден Стејт и Оклахома. Ако Тандер победат во шестиот натпревар и се пласираат во големото финале, Кавалирс ќе имаат предност на домашен терен, а серијата би започнала во четврток.

Ако, пак, Вориорс направат пресврт на резултатот и победат два меча во низа, тогаш ќе имаме реприза од ланското финале. Во тој случај Кливленд ќе стартува како гостин, односно актуелниот шампион ќе ја има предноста на домашен терен.

За Кавс ова е трето финале, клубот постои 52 години, а до сега ја нема освоено титулата. Прв пат имаа шанса со младиот Леброн, во 2007 година, но беа поразени од Сан Антонио.

Лани го изгубија финалето во шест натпревари од Голден Стејт, а ќе видиме сега дали ќе им биде трета-среќа.

Торонто се збогува од најдобрата сезона во својата клупска историја, ништо повеќе не можеа.

Кога за момент се чинеше дека може да се вратат во мечот на почетокот од последната четвртина, следуваше серија на гостите од 14-3, Леброн постигна 6 поени во тој период, и веќе беше јасен победникот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.