Магијата на Нејт Робинсон му донесе победа на Чикаго по 3 продолженија (видео)

Магичните потези на бекот Нејт Робинсон му донесоа блескав триумф на Чикаго, по три продолженија против Бруклин, за предност од 3-1 во победи во првата рунда од плејофот во НБА.

Чикаго губеше со 95-109, во последната четвртина и кога сите помислија дека Бруклин ќе израмни на 2-2, на сцена стапи Робинсон. Во серијата од 14-0 на Булс, тој даде 12 поени, а домаќините се изборија за продолжение од 5 минути. Повторно немаше победник, па крајот дојде дури по дополнителни 15 минути. Чикаго победи со 142-134, а Робинсон заслужено се најде на врвот на најновото издание на Топ-5 моменти, од синоќешната програма.

Оклахома сити и без помошта на повредениот Расел Вестбрук, стигна до триумф во драматичен финиш против Хјустон, со 104-101. Хјустон се врати од негатива од 26 поени и имаше водство во последниот период, но тогаш работите во свои раце ги презеде Кевин Дјурент. Даде дури 41 поен и заслужи две места на Топ-5.

Атланта благодарение на извонредната одбрана славеше со 90-69 над Индијана и намали на 1-2. Мемфис предводен од најдобриот дефанзивец во Лигата, Марк Гасол (24 поени и 13 скокови) ги победи ЛА клиперс со 104-83 и го израмни резултатот на 2-2. Двете екипи си ги добиваат натпреварите на домашен терен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.