Кливленд чекор поблиску до финалето во НБА (видео)

Кливленд Кавалирс повторно го искористи домашниот терен и со нова убедлива победа дојде до предност од 3-2 во финалната серија на Источната конференција против Торонто Репторс.

По двата порази во Канада, Кливленд ноќеска пред своите навивачи славеше со 116-78 и покажа дека не планира да се откаже од второ финале во низа. Победникот беше решен уште во првата четвртина која домаќините ја добија со 37-19, на полувреме веќе беше 65-34, а Торонто во ниеден момент не го загрози домашниот триумф. Најголемата разлика Кливленд ја достигна на нешто повеќе од три минути пред крајот кога поведе со 114-71 иако во тие моменти на теренот беше комплетната втора постава.

Големо олеснување за тренерот на Кливленд, Тајрон Лу, е враќањето на Кевин Лав кој по подолго време одигра одличен натпревар и беше најефикасен на теренот со 25 поени и одличен шут од поле – 8/10. Леброн Џејмс и Кајри Ирвинг реализираа по 23 поени, па Торонто немаше никакви шанси да се одбрани. Во тимот од Канада, Демар Дерозан постигна 14 поени, но само уште Лаури со 13 беше двоцифрен на крајот.

Статистички, Кливленд беше подобар во секој сегмент: 21 скок повеќе (48-27), шут од поле (51,7%-39,1%), шут за три (47,6%, 17,6%)…, па во таков случај беше невозможен друг исход освен овој.

Шестиот натпревар од серијата се игра утре вечер во Торонто, а евентуалниот седми повторно во Кливленд в недела.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.