Денеска во „Јавна соба“ со почеток во 17.00 часот започнува конференција на тема подобрување на дизaјн образованието во Европа.
Реномирани дизајнери, професори по дизајн, дизајн менаџери и претставници од деловниот сектор нудат решенија за подобрување на дизајн образованието во Европа со цел дипломираните дизајнери да станат поатрактивни на пазарот на трудот.
Искуствата од неколку земји низ регионот и централна Европа ќе бидат презентирани на дводневната конференција која наметнува прашања и теми кои ги тангираат и дизајнерите и компаниите. Темата е актуeлна од причина што во последниве пет години се продуцираат голем број на дизајн кадри, но неизвесно е нивното вработување.
Почетна точка е анализата на сегашната состојба во регионот и Европа и проблемите со кои се среќаваат компаниите по вработување на дизајнер, па оттука се трага и по аномалиите во образовните програми во земјите. Принципот на образование се разликува од една до друга институција и во голема мера зависи од наставниот кадар кој го пренесува знаењето.
Основното прашање е со кои предизвици ќе се судрат дизајнерите во идните 10 до 15 години и дали со сегашното образование тие ќе можат да одговорат на барањата и очекувањата на компаниите? Експертите од дизајн секторот очекуваат прагматични и применливи решенија независно од степенот на развој на државите.
Конференцијата е дел од европскиот проект „Дизајн Пракса“ во кој учествуваат „Јавна соба“, Европски универзитет, компанијата „Завар“ од Скопје, Хрватското дизајнерско друштво, „ВЕРН“ универзитетот, „Просторија“ од Загреб и „Дизајн Австрија“ – кровна дизајнерска асоцијација.
Резултатите од конференцијата во форма на прирачник за практична наобразба заедно со резултатите од работилниците кои следат во периодот јуни – октомври, 2016 премиерно ќе бидат претставени на Неделата на дизајн во Скопје од 24. до 28.ноември, 2016 во дизајн центарот „Јавна соба“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
