Историско финале на Истокот за Торонто, Мајами декласиран во мајсторката (видео)

Торонто Репторс на домашен терен го растурија Мајами Хит во мајсторката и за првпат во клупската историја се пласираа во конференциското финале, каде ќе играат против актуелниот шампион на Истокот, Кливленд Кавалирс.

Лори и Дерозан изиграа одлично кога е најпотребно и го одведоа својот тим во финалето на Истокот. Резултатот од седмиот меч во оваа полуфинална серија беше 116-89.

Торонто го надигра Мајами во сите сегменти од играта, посебно во скоковите и шутот за три поени. Домашниот тим имаше дури 20 скокови повеќе од противникот.

Кајл Лори шутираше извонредно, погоди пет тројки од седум обиди, заврши со 35 поени и 9 асистенции. Дерозан постигна 28 поени, на кои додаде и 9 скокови, а одлична поддршка имаа и од останатите тројца играчи од првата петорка. Центарот Бијомбо постигна дабл-дабл со 17 поени и 16 скокови, како и Патерсон кој имаше 11 поени и исто толку скокови. Керол одигра извонредно, скоро совршен во шутот, промаши само еднаш и натпреварот го заврши со 14 поени.

Гостите од Флорида имаа дури шестмина играчи со двоцифрен број на поени. Вејд и Драгиќ беа најефикасни со по 16 поени, но сепак недоволно против расположените Репторс вечерта.

Ова е прво конференциско финале во историјата за Торонто, а таму ги чека првиот фаворит и актуелен владетел на Истокот, Кливленд.

Во финалето на Западот играат актуелниот шампион Голден Стејт Вориорс и Оклахома Тандер.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.