Новак Ѓоковиќ ја продолжи својата доминација во дуелите со Рафаел Надал, откако попладнево го совлада шпанскиот ривал со 2-0 во четвртфиналето од турнирот во Рим. Надал игра многу подобро отколку лани, но се уште не успева да најде лек за извонредниот српски тенисер, од кого го загуби и седмиот натпревар во низа, воедно губејќи и 15 сета во серија.
Шпанецот има за што да жали бидејќи и во првиот и во вториот сет прв дојде до брејк предност, но не успеа да ја задржи. Првиот сет заврши во корист на Ѓоковиќ 7-5, а Надал „киксна“ во вториот, кога при водство од 5-4 на свој сервис имаше дури пет сет топки што не ги искористи. Ѓоковиќ ја искористи првата брејк-можност и израмни на 5-5, за потоа во тајбрејк да слави со 7-4 и да се пласира во полуфиналето.
Следен ривал на прворангираниот светски тенисер во Рим ќе му биде подобриот од дуелот Тием – Нишикори, додека во второто полуфинале ќе се сретнат Пуиј и Мареј.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
