Атланта и Торонто на чекор до полуфиналето во источната конференција (видео)

Екипите на Атланта хокс и Торонто се на чекор до пласман во полуфиналето од НБА-плејофот во источната конференција откако синоќа славеа во петтите мечеви на домашен терен извојуваа победи над Бостон и над Индијана.

Атланта го надмина очајниот почеток на мечот и успеа да слави над Бостон со 110-83. „Јастребите“ играа многу слабо на почетокот од натпреварот, во првите 18 минути постигнувајќи само 19 поени, за границата од 20 поени да ја надминат со положувањето на Милсап на средината од втората четвртина (до тој момент Атланта шутираше од поле 6/34). Сепак, кошаркарите на Атланта се разбудија во вистински момент, па со фуриозен настап до крајот на мечот успеаја да стигнат и до триумф изразен со огромни 27 поени разлика. Мајк Скот беше најефикасен кај Атланта со 17 поени, еден повеќе од Тиг и од Бејзмор.

Водство од 3-2 во својата серија од источната конференција има и Торонто, кој синоќа славеше над Индијана пејсерс со 102-99. Како пресудна се покажа последната четвртина во која „рептилите“ одиграа фанатична одбрана и со само девет примени поени (25-9) направија пресврт и стигнаа до голем триумф. Де Розан беше најзаслужен за победата со 34 поени, додека кај Индијана извонреден беше Пол Џорџ со 39 поени, сепак недоволни за победа во Канада. Вреди да се напомене дека „пејсерси“ постигнаа тројка за продолжение, но судиите решија да не ги признаат поените откако времето за крај на мечот беше истечено.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.