Хулиганите на СДСМ повикуваат на ново Куманово: Поддржуваат терористи или сакаат смрт на полицајците

Осуммина полицајци, осуммина херои, припадници на безбедносните сили ги положија своите животи во мај минатата година, во кумановската населба Диво Насеље, за да ја одбранат Македонија.

Во 28-часовна непрекината борба македонската полиција ја изведе најтешката, најсложената операција, а македонските бранители со сите сили и во служба на државата го бранеа народот.

Македонија тој кобен ден загуби осум херои: Жарко Кузмановски, Ненад Серафимовски, Сашо Самојловски, Бобан Ивановиќ, Горан Илијевски, Исамедин Османи, Љубиша Аранѓеловиќ и Горан Стојменовиќ.

Загубивме херои кои заедно со нивните колеги спречија убиства на можеби осум илјади луѓе. Слава им! Нивниот патриотизам и херојство ќе биде пример и водилка на идните генерации. Нивната жртва нема да се заборави. Покрај убиените ранети и повредени се уште 37 полицајци, изјави тогашниот премиер Никола Груевски.

Насилниците кои синоќа дивееја во Скопје, поттикнати од СДСМ и СОРОС удрија по македонската полиција. Полицајците кои постојано се во одбрана на граѓаните, вчера беа жртва на удари од неколку хулигани. Тие освен што ги тепаа и пцуеја македонските бранители, им посакаа уште еднаш да им се случи „Куманово“.

Народот е згрозен по ова. СДСМ и СОРОС како поттикнувачи на овие немири не се оградија од ваквото однесување. Така, преку ова видео беше испратена порака до цела Македонија, до сите граѓани. Но, ваквото нивно однесување со сигурност најмногу ќе ги здоболи мајките, сопругите и децата на загинатите во Диво Насеље кои го положија животот да спасат илјадници граѓани.

Мал дел од тие граѓани, со вжештени глави, на протести поддржани од СДСМ и СОРОС, посакуваат да има уште жртви меѓу припадниците на безбедносните сили.

Лани во мај Заев и СДСМ за теснопартиски интереси тврдеа дека кумановските настани се сценарио на власта. На македонската јавност ѝ потрошија неколку месеци време и енергија со кампања против власта и антидржавните напади поврзани со настаните во Кумановско.

Лидерот на СДСМ тогаш не ги посети семејствата на загинатите бранители ниту припадниците на безбедносните сили кои беа повредени во акцијата за неутрализирање на терористите. Напротив, Заев го посети Диво Насеље и во добро расположение се фотографираше со жителите.

Во континуитет даде повеќе изјави со кои се фрлаше сенка на акцијата, а опозицискиот блок иницираше и отворање на меѓународна истрага поради сомневања за исценирање на кумановските настани.

Еден од најскандалозните ставови за акцијата во Куманово дојде токму од портпаролот на СДСМ. Додека македонските специјалци војуваа со терористите тој на фејсбук напиша статус во кој се исмеваше со трагичните настани.

„Како мал не му давале да си игра камај, па сега мора тоа да го изживее. Не знам дали му кажале, дека во камај имаше и еден термин кога ќе те фатат. Тогаш на фатениот му се викаше жив…”, напиша Шилегов по борбата на полицајците со групата за која Заев надвор велеше дека е еднакво сериозна како онаа од Париз.

И поразениот претседателски кандидат на СДСМ Стево Пендаровски излезе со скандалозно тврдење за бугарска информативна агенција.

Инцидентот во Куманово е фабрикуван од власта и поконкретно од македонската партија во владејачката коалиција на премиерот Груевски – рече Стево Пендаровски во изјава која ја пренесе Либертас.

Настаните во Куманово се случија во екот на опозициските протести пред владата. И покрај сериозната закана по безбедноста на државата агендата на опозицијата не беше променета – голем дел од безбедносните сили и натаму беа ангажирани за обезбедување на настаните на СДСМ, меѓу другото и за големиот митинг кој сепак се одржа само 7 дена по крвавите настани.

За разлика од настаните во Париз, во кои загинаа над 130 лица, македонските безбедносни сили со акцијата во Диво Насеље целосно спречија терористичката група да предизвика цивилни жртви. Неофицијално, биле планирани големи напади во главниот град меѓу кои и напад на Камениот мост и на еден голем трговски центар.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.