Нова медицинска опрема за онкологија обезбедена од донација на Австралија

Донација во медицинска опрема во вредност од три милиони австралиски долари обезбеди гeнералниот конзул на Република Македонија од Мелбурн, Бети Коруновска, во соработка со Министерствата за здравство на РМ и на Австралија,

Станува збор за комплетен современ систем (акцелератор) за радиотерапија, за лекување малигни заболувања, кој ќе биде инсталиран на Клиниката за радиотерапија и онкологија во Скопје.

Како што се наведува во соопштението од генералниот конзулат на Македонија во Мелбурн, донацијата е обезбедена во соработка на ДКП на РМ во Австралија со Колин Хорнби, советник во Министерство за здравство на Викторија, Катерина Алексовска – заменик советник во Министерство за здравство, Алдо Ролфо, генерален менаџер на Радиолошка онкологија за Австралија, Џон Варгесе – Комерцијален директор на Радиолошка онкологија и грижа за срце на Викторија, претставници на Вариан Линак од СР Германија, Џенесис Кеар – австралискиот водечки провајдер за радиолошка онкологија и Министерството за здравство на РМ, кое ги обезбеди бараните специфични услови од страна на австралиските институции.

– Подготвеноста на Република Македонија да одговори позитивно на сите барани услови во предвидените рокови, ги даде своите резултати- опремата пристигна во Македонија, завршени се сите постапки кои се однесуваат на превоз, шпедиција и царинење и по завршување на подготвителните активности, се очекува нејзино инсталирање на Клиниката за радиотерапија и онкологија во Скопје. Со оваа донација е направен важен исчекор во заземање повисоко место на Република Македонија, во светските статистики од областа на здравството – стои во соопштението.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.