Заменик-министерот за образование и наука Спиро Ристовски денеска го посети Основното училиште „Блаже Конески“ во село Скудриње во општина Маврово-Ростуше, каде што се работи на поставување современ централен систем за греење.
Ристовски посочи дека инвестицијата е на барање на жителите и дека е од исклучителна важност поради тоа што во изминатите 60 години, откога е изградено ова училиште, се употребувале шпорети на дрва.
– Како ресорно Министерство, инвестиравме околу 6 милиони денари за воспоставување целосно нов систем за греење и за 30-ина дена целиот процес ќе биде завршен. Тоа значи дека од следната грејна сезона наставниот кадар ќе има значително подобрени услови за работа, а учениците полесно ќе можат да го надградуваат своето знаење, истакна Ристовски.
Во плановите на Министерството за образование и наука е и изградба на спортска сала во состав на ова училиште, коешто го посетуваат околу 200 ученици.
Покрај посетата на Скудриње, Ристовски оствари средби и со жителите на Ростуше и на неколку околни населени места.
Во општината Маврово-Ростуше досега се инвестирани 7,3 милиони денари во надградба, реконструкција и санација на три училишни објекти.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
