Барса убедливо против Гетафе, Меси со два нови рекорди (видео)

Барселона ја декласираше екипата на Гетафе со 6-0 во првиот натпревар денес од 29. коло во Примера Дивизија и ја продолжи низата – 37. натпревар за нив без пораз.

Луис Суарез го преседе натпреварот на клупата. Меси и Нејмар беа во центарот на вниманието, Бразилецот постигна два гола, а Аргентинецот еден гол и дури три асистенции, но и уште еднаш не беше прецизен од белата точка – четврти негов промашен пенал сезонава.

Уште во осмата минута Алба упати центаршут од левата страна, по кој гостинскиот играч Родригез постигна автогол. Само три минути подоцна Нејмар беше фаулиран во шеснаесетникот. Меси шутираше од белата точка, но промаши и со тоа постави неславен рекорд за Каталонците – најмногу промашени пенали во една сезона во историјата на шпанскиот фудбал, Барса има 8 нереализирани удари од белата точка. Меси со четири, а Нејмар и Суарез со по два промашени пенали.

Сепак, тоа не ја поремети играта на Барса, до крајот на полувремето постигнаа уште три гола. Во 19. минута Меси асистираше до Мунир Ел Хадади кој со глава погоди за 2-0. Во 32. минута Нејмар беше прецизен по асистенцијата на Меси, втора за него на натпреварот, а во самиот финиш на првиот дел Аргентинецот со извонреден удар од 20-тина метри реализираше за 4-0.

На почетокот од второто полувреме Барселона со брзи два гола стави точка на овој натпревар. Во 51. минута Меси по трет пат асистираше, повторно до Нејмар, кому не му беше тешко да погоди за 5-0. Шест минути подоцна Пике нафрли во шеснаесетникот, а одлично реагираше Арди Туран кој со „ножички“ ја смести топката во мрежата и ги постави конечните 6-0.

Покрај неславниот рекорд, сепак на натпреварот имаше и уште еден, позитивен, рекорд на Меси. Аргентинецот постави личен рекорд, прв пат на еден натпревар оствари три асистенции.

По оваа победа Барселона има 11 бодови повеќе од Атлетико Мадрид и дури 15 повеќе од Реал Мадрид, но мадридските екипи сеуште ги немаат одиграно натпреварите од ова коло.

Уште еден натпревар е завршен, Селта Виго минимално го совлада Реал Сосиедад со 1-0.

Во вечерните термини играат Атлетико Мадрид – Ла Коруња и Ваљекано – Еибар.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.