Голден Стејт преку Оклахома до вториот најдобар резултат во историјата (видео)

Актуелниот НБА шампион Голден Стејт и во новата сезона е неприкосновен, рушејќи неколку рекорди од стартот на сезоната. Синоќа на домашен паркет ја совладаа екипата на Оклахома во нивниот 50.натпревар со 116-108 и се израмнија со тимот на Филаделфија која во сезоната 1966/67 истотака имаше 46 победи од 50 натпревари.
Вориорс за малку ќе прокоцкаа 20 поени предност против Оклахома, бидејќи во третата четвртина одиграа катастрофално лошо, па Тандер дојде до негатива од само два поени. Домашните кошаркари не дозволија нивната неверојатна низа победи пред своите навивачи да застане и ја забележаа 41-та по ред на домашен терен.
Сега им недостигаат само уште три триумфи пред своите гледачи за да го урнат рекордот на Чикаго булс од периодот од 1995 до 1996 година.
Оклахома сити одигра одличен натпревар, особено двете најголеми ѕвезди на оваа екипа, Дурант постигна 40 поени, а Вестбрук реализираше 27 поени и 12 асистенции, но и тоа беше недоволно за да се стави крај на серијата шампионот. „Воините“ повторно одиграа колективно, а кога беше најпотребно блесна Стеф Кари, кој постигна шест поени и имаше две асистенции во завршната серија од 12-4 со која Голден стејт си ја осигура победата. Кари беше најефикасен во својот тим со 26 поени и 10 асистенции, Барнс постигна 19, а Томпсон 18 поени за актуелните шампиони.

Коби Брајант неколку пати стана шампион во НБА-лигата и тоа на сметка на Сан Антонио, но утринава во неговото последното гостување во „Аламо дом“ тој не можеше ги одведе Лејкерс до уште една победа. Спарс славеа со 106-102 против младите Лејкерс, кои беа предводени од ветеранот Брајант со 25 поени. Џордан Кларскон постигна 21 поен, додека Џулиус Рандл постигна 15. Кај Сан Антонио, најмногу се истакан Ламаркус Олдриџ со 26 поени, а Кави Леонард реализираше 20 поени.

НБА резултати:

Хјустон – Портланд 79-96, Шарлот – Вашингтон 108-104, Индијана – Детроит 112-104, Кливленд – Њу Орлеанс 99-84, Филаделфија – Бруклин 103-98, Мемфис – Далас 110-114 (по прод.), Минесота – Чикаго 112-105, Сан Антонио – ЛА лејкерс 106-102, Голден стејт – Оклахома сити 116-108, Феникс – Јута 89-98.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.