ВМРО-ДПМНЕ: Фер и демократски избори ќе има и тоа не е прашање кое СДСМ треба да го загрижува

Македонија мора да оди напред, не смее веќе да биде заложник на политичката криза. Одговорното и достоинствено однесување мора да биде императив за сите политички фактори, се вели во соопштението од ВМРО-ДПМНЕ кое вечерва е испратено до медиумите.

Република Македонија мора да оди напред и не смее веќе да биде заложник на политичката криза и агонијата која е создадена изминатиот период. Народот бара решенија за секојдневните проблеми, а не партиите како приоритет да ги имаат личните интереси на нивните раководства.

Фер и демократски избори ќе има и тоа не е прашање кое СДСМ треба да го загрижува. Тоа што СДСМ треба да го загрижува е отпорот кој се создаде во државата против нивната деструктивна политика, базирана на фабрики за афери, сплетки, интриги, шпиунски филмови и манипулации.

Државата, нејзината иднина и иднината на граѓаните не смеат да зависат од себичноста, деструктивноста и кусогледоста на неколку лица од опозицијата. Агонијата треба да ја оставиме зад нас.

– Очекуваме СДСМ како партија која го води МВР и има одлучувачко влијание во ДИК, единствените институции од кои директно зависат изборите, да го даде својот придонес во организирањето на фер и демократски избори и да не го опструира процесот заради стравот од соочувањето со граѓаните. Впрочем, новата Влада во која ќе учествуваат има една цел, организирање на избори. Доста е од закани, доста е од лажни пароли и навреди, време е Македонија да продолжи напред по патот на напредокот. Граѓаните тоа го очекуваат од нас – стои во соопштението на ВМРО-ДПМНЕ.

На 24-ти април народот на фер и демократски избори ќе каже што мисли за партиите и за нивното однесувaње и понуда, програма, и СДСМ нема да можат да избегаат од волјата на народот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.