Во 2015 година Ајфеловата кула ја посетија околу 7 милиони лица, поточно 6,91 милиони, од кои 80% се странци, но сепак посетеноста на најпознатиот споменик во Париз е за 2,5% помала во споредба со 2014 година кога старата „железна дама“ ја посетија 7,1 милиони лица, јавува дописникот на МИА од Париз.
Бројките беа соопштени од претпријатието задолжено за управување со Ајфеловата кула (СЕТЕ).
„Пред трагичните настани кои ја погодија престолнината во ноември 2015, посетеноста беше во пораст од 1%“ – се вели во соопштението за јавноста.
Според дирекцијата, посетеноста петнаесетина дена по атентатите се намали на 10.000-15.000 дневно, наместо вообичаените 15.000-20.000. Притоа споменикот беше затворен два дена за гости. За време на божиќните празници посетеноста достигна 22.000 дневно.
Најбројни гости од странство се Американците, потоа Канаѓаните, следени од Британците, Шпанците и Италијанците.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
