Челси почна да победува без Мурињо, нов кикс на Манчестер јунајтед (видео)

Актуелниот шампион на Англија, Челси, по отказот на Жозе Мурињо го одигра првиот натпревар како што се очекуваше од почетокот на сезоната. Денеска на „Стенфорд бриџ“ сините од Лондон го победија Сандерленд со 3-1 и покажаа дека имаат квалитет за искачување на горниот дел од табелата. Прашањето на победникот беше решен уште по првите 30 минути со головите на Ивановиќ и Педро. Оскар на стартот од второто полувреме од пенал зголеми на 3-0, а конечните 3-1 ги постави Борини во 53. минута.

Chelsea vs Sunderland 3 -1 All Goals 19.12… by abdo-hv2

На Челси му тргна со нов тренер, но затоа Манчестер јунајтед продолжува да тоне со Луј ван Гал на клупата. Холандскиот стратег немоќно гледаше како неговиот тим губи на „Олд трафорд“ од Норвич со 1-2, втор пораз во низа од новите премиерлигаши по неуспехот против Бурнемаут во минатото коло. Руни се врати во екипата и повторно беше очаен, во својот јубилеен 500. меч за „црвените ѓаволи“, за кои единствениот погодок го постигна Марсија, оној почесниот откако претходно Норвич поведе со 0-2 со головите на Џером и Тети. По овој најнов неуспех, уште повеќе се тресе позицијата на Ван Гал, особено откако се погласни станаа гласините дека Жозе Мурињо е сериозно заинтересиран да седне на клупата на Манчестер јунајтед.

Manchester United vs Norwich City 1-2 ► All… by kartochi

Лестер продолжи со фантастичните резултати и ќе го дочека Божиќ како лидер на премиерлигашката табела откако „лисиците“ попладнево славеа со 2-3 на тешкото гостување против Евертон. Одлично тактички поставени, гостите трпеливо ја чекаа својата шанса и изнудија два чисти пенали што Махрез ги претвори во погодоци, пред Варди да асистира до Оказаки за третиот погодок и новата победа на Лестер. Првиот погодок за Евертон беше дело на Лукаку, кој сега е стрелец на седум премиерлигашки мечеви во низа, четири помалку од рекордот на Варди. Вториот беше дело на Миралјас во 89. минута

Резултати Премиерлига:

Челси – Сандерленд 3-1, Манчестер ј. – Норвич 1-2, ВБА – Бурнемаут 1-2, Стоук – К. Палас 1-2, Саутемптон – Тотенхем 0-2, Евертон – Лестер 2-3.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.