Фотографот на „Република“, Ѓорги Личовски, ја доби годинашната награда на УНИЦЕФ за фотографија на годината.
Личовски денеска се наоѓа во Германија каде што присуствуваше на доделувањето на наградата.
Секоја година, УНИЦЕФ Германија и Гео Германија (од издавачката куќа „Грунер + Јар“) доделуваат „УНИЦЕФ Фотографија на годината” за фотографии и фото галерии што најдобро го отсликуваат карактерот и условите за живот на децата низ целиот свет на извонреден начин.
– Македонскиот фотограф Ѓорги Личовски е победник на конкурсот „УНИЦЕФ Фотографија за 2015 година“. Неговата репортажа ја отсликува состојбата со бегалците на границата меѓу Грција и Македонија, информираат од УНИЦЕФ.
– На 21 август 2015 година, на грчко – македонската граница, се случи трауматична ситуација за две деца бегалци што беше проследена од фотографот Ѓорги Личовски. Тој верувал дека за време на неговиот живот како фотограф веќе видел што е страдање, од распадот на Југославија до протерувањето на стотици илјади косовски Албанци. Но, вознемирувачката ситуација што тој ја посведочил таму ги расплакала и него и неговите колеги, објаснуваат од организацијата.
Со цел да допрат до чувствата на македонските гранични војници, некои бегалци ги испраќаат своите жени и деца до нив. Во масата на луѓе што се туркаат, децата се одвојуваат од родителите и понекогаш се носат преку границата од непознати лица, додека нивните родители и роднини остануваат заглавени на граница. Уште една трагедија во рамките на оваа глобална трагедија што започнува во Авганистан, Ирак и Сирија – и очигледно не завршува во Европа.
Според проценките на УНИЦЕФ, околу една четвртина од 730.000 бегалци што пристигнале во Европската унија преку балканските држави во периодот од јануари до ноември 2015 година се деца.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
