Ентони Дејвис подобар од Џејмс, Њу Орлеанс го победи Кливленд (видео)

Синоќа во НБА лигата беа одиграни шест натпревари. Најинтересно беше во Њу Орлеанс каде домашната екипа славеше над Кливленд по едно продолжение со 114-108.
Ова беше втор пораз за Леброн и другарите во низа, и залудни беа неговите 37 поени од кои 21 во последната четвртина кога не добива помош од соиграчите. На спротивната страна Ентони Дејвис имаше дабл-дабл учинок од 31 поен и 12 скока и беше најзаслужен за победата на својот тим.

ЛА Лејкерс го доживеаа 16 пораз оваа сезона и се заковани на последното место во западната конференција. Ноќеска „езерџиите“ немаа што да бараат кај Атланта и заслужено загубија со 100-87. Заморениот Коби Брајант постигна 14 поени за својот тим додека на спротивната страна Ал Хорфорд реализираше 16 поени.

Одлична пресметка имаше во Вашингтон каде домаќинот го надигра Феникс и ја запиша осмата победа во сезонава. Исклучително расположен беше кај домашните Бредли Бил со 34 поени, притоа со пет тројки од осум обиди. На сето тоа дополни и девет скока и пет асистенции. Од другата страна расположен беше Ерик Бледсо со 22 поени и седум асистенции.

Џејмс Харден, пак, со 25 поени го реши Далас, кој освен Дерон Вилијамс немаше вистински одговор на теренот. Дирк Новицки беше солиден со 16 поени и 10 скока, но со многу промашувања од игра.

НБА резулати:
Њујорк – Бруклин 108-91, Вашингтон – Феникс 109-106, Детроит – Милвоки 102-95, Атланта – ЛА Лејкерс 100-87, Далас – Хјустон 96-100, Њу Орлеанс – Кливленд 114-108.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.