Највисокиот вулкан во Европа, Етна, на источниот брег на островот Сицилија, денеска повторно се разбуди со една од најмоќните ерупции во последните децении, пренесоа агенциите.
Вулканот исфрли голем облак од црн пепел, кој го покри небото над градовите во близина и наложи затворање на аеродромот „Стрето“ во соседната област Реџо ди Калабрија, на 70 километри од Етна, во континенталниот дел на Италија.
Според италијанскиот Национален институт за геофизика и вулканологија, кратката, но многу моќна ерупција е регистрирана рано утринава меѓу 2:20 и 3:10 часот по македонско време. Формирана е фонтана од лава, која се издигнала на над 1 км над вулканот, а тој е висок 3350 метри. Жешки остатоци се издигнале на 3 километри над кратерот.
Според научниците, тоа е најмоќната ерупција на Етна, еден од најактивните вулкани во светот, во последните 20 години.
Ветровите го однеле вулканскиот облак во североисточен правец, кон градовите Лингуаглоса, Франкавиља ди Сичилија, Месина и Реџо Калабрија.
Локалните медиуми објавија дека жителите на Реџо Калабрија денес по улиците носат чадори и ги затвораат носевите и устите со марамчиња, за да се заштитат од црниот прав, кој го отежнува дишењето.
Една од најмоќните ерупции на вулканот во поново време беше во 1992-93 година.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
