Трипл-дабл на Вестбрук, Леброн сам го одведе Кливленд до победа (видео)

Оклахома ја забележа петтата победа оваа сезона благодарејќи на учинокот на бекот Расел Вестбрук. Тој реализираше 22 поени и по 11 скока и асистенции за лесната победа над Вашингтон 125-101. Тоа беше негов 24. трипл-дабл во кариерата, но не смеат да се заборават ниту Дион Вејтерс и Серж Ибака кои беа најефикасни, првиот со 25, вториот со 23 поени.
Првата ѕвезда во екипата на Оклахома Кевин Дурант одигра 17 минути во првиот кога при еден влез во противничкиот рекет ја повреди задната ложа и мораше остатокот од мечот да го проследи од клупата. Дурант до тој момент беше фантастичен со 14 поени и десет скока.

Минатогодишниот финалист екипата на Кливленд благодарејќи на Леброн Џејмс ја запиша седмата победа по ред во новата сезона. Синоќа Кливленд победи со 118-114 против Јута, а најзаслужен беше „кралот“ Џејмс реализирајќи 31 поен од кои дури 17 во последниот период од мечот. Неговиот тим губеше со девет поени разлика на средината од последната четвртина, но тој целосно ја превзеде контролата над натпреварот, иницирајќи го пресвртот и носејќи му нова победа на Кливленд. Одлична помош доби и од Мо Вилијамс, кој реализираше 29 поени.

НБА Резултати:
Кливленд – Јута 118-114, Вашингтон – Оклахома 101-125, Мајами – ЛА лејкерс 101-88, Торонто – Њујорк 109-111, Милвоки – Бостон 83-99, Минесота – Шарлот 95-104, Њу Орлеанс – Далас 120-105.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.