Во четврток се спојуваат „Вип“ и „Оне“ – што ќе значи тоа за нивните корисници?

Операторите „Вип“ и „Оне“ ја затворија трансакцијата за спојување на двата правни ентитетa во една компанија – „Оне.Вип“ ДОО Скопје, кој сега е предмет на регистрација во Централниот регистер на Република Македонија. Затворањето на трансакцијата се случува откако во јули, годинава, Комисијата за заштита на конкуренцијата на Република Македонија го одобри спојувањето на двата телекомуникациски операторa.

Новоформираниот споен субјект „Оне.Вип“ официјално се очекува да биде регистриран на 1.10.2015 година. Од тој датум, новата компанија целосно ги презема сите права и обврски кои произлегуваат од досегашното работење на „Вип“ и „Оне“, вклучувајќи ги и договорите што ги имаат корисниците, а кои продолжуваат да важат под истите услови под кои се склучени. Ова значи дека корисниците и понатаму ќе добиваат најдобри услуги, со највисок квалитет и со непроменети цени, согласно со тарифниот модел што го имаат избрано.

Сè до целосната интеграција на сите технички системи, што се очекува да заврши до крајот на 2016 година, новата компанија „Оне.Вип“ ќе продолжи да ги обезбедува услугите за корисниците преку постојните мрежи, тарифни портфолија и продажни места на „Вип“ и на „Оне“.

Новата компанија „Оне.Вип“ ќе поседува доволен капацитет и обем кои ќе ѝ овозможат зголемени инвестиции и иновации, кои ќе ѝ овозможат да креира конвергентни понуди преку комбинација на современи мобилни комуникации, Интернет и ТВ, со најдобар однос цена – квалитет на пазарот. Истовремено, спојувањето ќе ја стимулира и конкуренцијата, што ќе биде од полза за корисниците и за понатамошниот развој на пазарот.

Новата компанија „Оне.Вип“ и понатаму ќе го задржи фокусот кон потребите на корисниците, останувајќи целосно посветена на креирањето понуда која ќе гарантира супериорно корисничко искуство.

Договорот за спојувањето на подружниците на „Групацијата Телеком Австрија“ и „Телеком Словеније Груп“ во Македонија беше објавен на 22 октомври 2014 година. Според тој договор, „Групацијата Телеком Австрија“ поседува 55 проценти и ќе има целосна контрола врз новосоздадената компанија „Оне.Вип“, додека „Телеком Словеније Груп“ поседува 45 проценти од сопственоста. Покрај тоа, договорот вклучува и опции за излез на „Телеком Словеније Груп“ од заедничката компанија во рок од три години од завршувањето на спојувањето.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.