Традиционално, на еден месец пред почетокот на новата НБА-сезона и спроти почнување на подготовките на тимовите, главните ѕвезди на тимовите имаат прес-конференција со новинарите и, меѓу другото, ги известуваат за својата иднина.
Главниот играч на Далас Маверикс, Германецот Дирк Новицки соопшти дека ќе го испочитува договорот со својот клуб и ќе игра уште две години пред да замине в пензија.
– Мислам дека уште тие две години ќе играм на високо ниво – истакна 37-годишниот Новицки, кој во 2007 година беше прогласен за МВП на НБА-лигата, а четири години подоцна со тимот од Тексас го освои шампионскиот прстен и беше избран за најдобар играч во финалето.
Коби Брајант, кој со Лејкерс петпати ја освои НБА-круната, на традиционалната конференција за новинарите, која се одржува еден месец пред почетокот на сезоната ги отфрли шпекулациите дека в година ќе ја заврши кариерата. Тој секако ќе ја одигра и оваа сезона за која треба да заработи 25 милиони долари.
– Мора да кажам дека пред оваа сезона многу сум некако возбуден. Токму поради тоа не сакам да се истрчувам со изјави кога би се пензионирал. Ќе видиме – рече Брајант.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
