Џентилони: Бегалската криза закана за „душата на Европа“

Бегалската криза се заканува на еден од суштинските столбови на Европската унија – слободното движење на луѓето, смета шефот на италијанската дипломатија Паоло Џентилони, оценувајќи дека на тоа прашање ќе се види дали „Европа ќе ја открие својата душа или засекогаш ќе ја загуби“. Хаотичните сцени што ги видовме викендов на границата меѓу Грција и Македонија претставуваат вистинска закана по слободата на движење на луѓето во европскиот блок. Во поглед на емигрантите, Европа е во опасност да го покаже најлошото кај себе: себичност, хаотично донесување одлуки и караници меѓу земјите-членки – истакна Џентилони за италијанскиот весник „Месаџеро“.Тој ги повика партнерите од Европската унија да престанат со караниците и да работат на заеднички излезе од кризата. Алтернативата, според него, е неибежен колапс на Шенгенскиот систем, кој овозможува слободно движење на поголемиот дел на континентална Европа.

– Од брегот на Сицилија до Кос, од Македонија до Унгарија, и во Кале, тензијата расте и со тек на време може да го доведе во прашање Шенгенскиот договор – истакна тој, пренесува „Танјуг“.

Џентилони прашува дали може да се замисли Унијата без Шенген и враќање на старите граници, истовремено констатирајќи дека емигрантите не стигнуваат во Грција, Италија или Унгарија, туку во Европа, поради што и правилата мора да бидат европеизирани.

Во меѓувреме, во Германија, германскиот вицеканцелар Зигмар Габриел и шефот на германската дипломатија Франк Валтер Штајнмаер упатија заеднички повик за преиспитување на политиката на азил во ЕУ.

– Неопходно е приливот на бегалци чесно да се подели – оценија за неделното издание на „Франкуртер алемајне цајтунг“. Тие побараа и воведување „европски правила за азил“, кои би го гарантирале статусот на азилантите во ЕУ.

Министрите за внатрешни и надворешни работи од ЕУ за бегалската криза ќе разговараат кон средината на октомври, пред самитот на Малта во ноември, соопшти во четвртокот министерот за внатрешни работи на Франција, Бернар Казнев.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.