Повеќе од 17 години откако е одобрен првиот лек за машката еректилна дисфункција, американската Управа за храна и лекови (FDA) во вторникот го одобри лекот за ниската сексуална желба кај жените, популарно наречен „женска вијагра“, пренесуваат агенциите, пишува Макфакс.
Лекот под име „Addyi“ би требало да го лекува пореметувањето на хипоактивната сексуална желба кај жените пред менопауза.
FDA го одобрила лекот со предупредување за потенцијални опасни нус појави, како низок притисок и опасност од губење на свест, особено ако лекот се зема со алкохол.
„Станува збор за најголем напредок во женското здравје по изумот на таблетите за контрацепција. Со ова се легитимира женската сексуалност како важна компонента за здравјето“, соопшти Националната организација на потрошувачите.
Меѓутоа, Здружението за заштита на потрошувачите „Public Citizen“ предвидува дека лекот ќе се повлече од употреба во рок од неколку години бидејќи според нив, претставува голем ризик за жените, а носи мала корист.
Лекот на фирмата „Sprout Pharmaceuticals”, веќе два пати беше одбиен, во 2010 и 2013 година, а сега FDA сепак го одобри со прецизни упатства дека пациентките мораат во потполност да бидат предупредени за можните здравствени ризици.
„Addyi“ е одобрен по лобистичка кампања во која учествуваа неколку женски здруженија.
Жените кои во текот на клиничката студија земаа „Addyi“ имале просечно по едно сексуално доживување месечно, повеќе, од жените кои земале плацебо.
Заговорниците на лекот тврдат дека станува збор за значајни резултати, додека критичарите сметаат дека потенцијалните ризици далеку ја надминуваат користа.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
