МВР вчера го приведе Ф.И.(24) од Скопје, кој беше недостапен за органите на прогонот, а се бараше во рамки на антитерористичката акција „Ќелија“.
-По претходно преземени мерки и активности, осомничениот беше лоциран и лишен од слобода околу 14 часот во близина на Бит-пазар по што беше предаден на надлежниот Јавен обвинител и спроведен во истражен затвор за издржување на претходно изречената мерка притвор во времетраење од 30 дена. При приведувањето не се регистрирани инциденти и немаше употреба на средства за присилба – соопштуваат од МВР.
Приведениот е еден од 36-те осомничени лица за кои од досега обезбедените докази до Основно јавно обвинителство за гонење на организиран криминал и корупција беше поднесена кривична пријава за сторени кривични дела „учество во странска војска, полиција, паравоени и параполициски формации“ предвидено и казниво по член 322-а од Кривичниот законик на Р.Македонија. Вклучувајќи го и него, вкупно 10 лица од осомничените досега се обезбедени, додека по останатите 26 кои се недостапни, сè уште се трага.
Според сомненијата кои ги има МВР од истрагата Ф.И. бил логистичар на групата, но во неколку наврати имал и неуспешни обиди да замине за Сирија. Лицето со кое вториот пат се обидел да замине преку Турција, исто така е опфатено со кривичната пријава и сеуште се наоѓа во Сирија и војува во муџахединските единици на Исламската држава.
Последниот негов обид за заминување за Сирија (преку Р.Турција) е на 03.06.2015 година, кога не му беше овозможен излез од Р.Македонија. Инаку намерата за неговото заминување за Сирија се претпоставува дека е поради извршување на логистички активности за потребите на џихадистите во Сирија кои се по потекло од земјава.
Осомничениот Ф.И. не минува во крим-евиденцијата на Министерството како извршител на кривични дела.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
