Ирска компанија го официјализира влезот во Македонија

Водечкиот ирски провајдер на софтверски решенија за глобалниот финансиски пазар „Баракуда фх“ ја избра Република Македонија за своја идна инвестициска дестинација.

Преку соопштение објавено на компанискиот веб сајт е официјализирана одлуката на компанијата за проширување на своите деловни активности во земјава.

Во конкуренција на повеќе првично селектирани земји и како резултат на упорната работа и заложби на владиниот економски тим за реализација на овој проект предводен од вицепремиерот Владимир Пешевски и заменик директорот на Инвест ин Маседониа, Климент Шекеровски, Македонија е избрана како најповолна дестинација која совршено се вклопува во идните развојни планови на „Баракуда фх“ која набрзо се очекува да отпочне со активности за отворање на центар за истражување и развој во земјава што ќе значи и можност за вработување, обука и доусовршување на домашен кадар од информатичките науки во реномирана компанија.

Според вицепремиерот Пешевски задоволството од успехот да се привлече ваква респектабилна компанија која доаѓа од земја која што е успешен пример за привлекување на странски инвестиции е огромен и е последица на макотрпна работа, низа владини реформски проекти и континуиран ангажман за креирање севкупен поволен деловен амбиент во Република Македонија и негување долгорочно партнерство со бизнис заедницата.

-Станува збор за компанија лоцирана во Даблин и која за нас како земја е особено значајно што станува дел од македонското бизнис семејство имајќи во предвид декa соработува и испорачува софтверски услуги за најреномирани светски банки и финансиски институции, а воедно е носител на престижни интернационални награди и признанија за достигнувањата во своето поле на делување. Се надевам дека влезот на „Баракуда фх“ ќе биде поттик и за други компании од Ирска коишто ќе го следат нивниот пример, а ние остануваме посветени на креирање нови можности и отворање нови перспективи за македонските граѓани– изјави Климент Шекеровски, кој што беше активно вклучен во проектот од самиот почеток кога беше воспоставен иницијалниот контакт со компанијата.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.