Министрите на државите членки на ЕУ и вчера не постигнале договор за начинот на кој ќе бидат распределени вкупно 40.000 сириски и еритрејски емигранти од Италија и од Грција, кои се под голем притисок на бегалците, соопштиле официјални лица од Брисел.
Министрите се согласиле да почне префрлувањето на повеќе од 32.000 емигранти во 28 членки на ЕУ, но не се договориле што ќе биде со останатите 8.000 од вкупно 40.000 колку што треба да бидат распределени според договорот со кој лидерите на ЕУ го постигнале на самитот во јуни.
– Имаме решение за преместување на емигрантите во текот на оваа година. Што се однесува за следната година, сè уште не сме се усогласиле, и за тоа ќе разговараме во октомври или ноември – изјавила по состанокот германската државна секретарка Емили Хабер.
Европската комисија предложила распределба на 40.000 емигранти по бродската несреќа што се случи во Медитеранот во април, кога загинаа речиси 800 лица.
Лидерите на ЕУ прво се согласиле со предлогот, а потоа меѓу нив се јавиле силни поделби во врска со начинот на неговото спроведување, по што најпрво ги отфрлиле задолжителните квоти, а потоа почнале и меѓусебните кавги во врска со распределбата на емигрантите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
