Организацискиот одбор на Интернационалниот фестивал на аматерски документарен филм (ФАДФ) „Камера 300“ кој секоја година се одржува кон крајот на октомври во Битола, го објави конкурсот за претстојното 23-то издание.
На ФАДФ „Камера 300“ може да учествуваат сите филмски аматери, членови на клубови, секции или самостојни автори од Европа кои ќе пријават филмови снимени на ДВД, МП4 или МПЕГ техника и титлувани на англиски јазик, а крајниот рок за пријавување на филмовите е 10 октомври.
Директорот на фестивалот Стефан Хаџи Антоновски истакна дека фестивалот, финансиран од Агенцијата за филм на РМ, годинава слави 110 години од донесувањето на првата филмска камера на Балканот и во Битола која, рече тој, браќата Манаки ги врами во историски рамки на филмската дејност.
– За македонскиот филм, како и за повеќето филмови во светот, 20-от век е век на создавање, развој и растеж. Ние, пак, имаме голем повод и јубилеј, бидејќи токму во 1905 година во родната куќа на браќата Јанаки и Милтон Манаки беа снимени првите подвижни слики во кои е снимена нивната баба Деспина како преде во семејниот двор, посочи Хаџи Антоновски.
Тој соопшти дека наскоро ќе ги објават и членовите на меѓународното стручно жири кое ќе ги додели наградите плакета „Милтон Манаки“, златна, сребрена и бронзена „Камера 300“, плакета за најдобра режија „Драги Савевски“, награда за репортажа и наградата на „Уника“.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
