Безбедносната состојба во Македонија е стабилна иако постојат одредени сознанија дека поединци или групи ќе посегнат кон одредени напади на поединци или на објекти во знак на одмазда за акцијата на македонската полиција во Куманово, изјави за медиумите министерот за внатрешни работи Митко Чавков по министерскиот состанок на МАРРИ во Скопје.
– Овие сознанија иницираат на можности од асиметрични закани на поединци или групи. Така што зголемувањето на нивото на безбедност во однос на подигањето на оперативно ниво е токму во тој правец на превенирање или одвраќање на такви активности. Но, во исто време сме должни да посочиме на можноста од такви ризици – додаде Чавков.
Тој денеска на маргините од состанокот имаше кус разговор со Скендер Хисени, министерот за внатрешни работи на Косово, кое од денеска е член на иницијативата МАРРИ. Хисени во изјава за медиумите рече дека е задоволен што Косово станало дел од МАРРИ, но избегна да одговори на прашањата на новинарите за случувањата во Куманово.
Ова е прва посета на Хисени на земјава по полициската акција во кумановската Дива населба.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
