Инвеститорите се откажуваат: Германските компании не сакаат повеќе да работат во Србија

Бавноста на реформите и непредвидливоста на економската политика се само некои од причините поради кои германските компании се незадоволни од условите за работа во Србија и тоа за прв пат по 10 години.
– Три фирми од Германија кои ги анализирале условите за работа во окружувањето отидоа во македонија, а не во Србија, рече директорот на делегацијата на германското стопанство во Белград Мартин Кнап.
Конкуренција
Претставувајќи ги анкетите на германско-српското економско здружение (DSW) за условите за работа во Србија за 2015 година, тој истакна дека во борбата за инвеститори конкуренцијата во источна Европа се зајакнала, како и тоа дека германските инвеститори почесто одат да инвестираат во Македонија отколку во Србија.
Амбасадорот на Германија во Србија, Хајнц Вилхелм оцени дека владините реформи сеуште не даваат резултати.
Нема полет
– Стопанството во Србија не е вистински придвижено и покрај мошне храбрите реформски чекори кои ги почна претседателот на Владата Александар Вучиќ. Не дојде до полет и раст во земјата и тоа важи и за германските претпријатија кои работат во Србија, рече амбасадорот кој забележа дека во Србија недостига претприемачки дух.
– Сметам дека тоа е тешка задача која не може да се речи од денес за утре, но токму овие реформски закони се движат во вистинска насока, рече Вилхелм и како пример за позитивно работење ја наведе „Ер Србија“.
Тој истакна дека од економски аспект земјата која води преговори за членство во ЕУ на добрат пат е да стане европска и да ги преземе европските стандарди.
– Процесот на приклучување на ЕУ тече и тоа е важен фактор, рече Вилхелм, кој не можеше да каже кога првите поглавја ќе бидат отворени бидејќи тоа е политичко прашање. Во Србија работат 370 фирми од Германија кои вработуваат 25.000 луѓе.