Ерменија бара да се прогласи за геноцид масакрот на Ерменците од пред 100 години

Ерменскиот Парламент денеска едногласно усвои резолуција со која меѓународната заедница се повикува да го прогласи за геноцид масакрот на 1,5 милион Ерменци во Османлиската империја, пред 100 години, и да го осуди како тешко злосторство против човештвото, пренесе ДПА.

Ерменија во петок ќе ја одбележи 100-годишнината од масакрот од периодот 1915-1916 година, во кој, според податоци на историчарите, биле убиени 1,5 милион Ерменци. На церемонијата во Ереван ќе присуствуваат претседателите на Русија, Владимир Путин, и на Франција, Франсоа Оланд.

Турција, државата наследник на Османлиската империја, го отфрла терминот геноцид и тврди дека бројката на жртви е преувеличена.

Ерменија и активистите за правата на човекот ја обвинуваат Анкара дека го негира геноцидот, забележува ДПА.

Досега над 20 земји го признаа геноцидот. Меѓу нив се Русија, Франција и Либан. Терминот геноцид го користат Европскиот Парламент, папата Франциско и други институции.

Германската Влада неодамна соопшти дека ќе поддржи во Парламентот да се поднесе предлогот за признавање на геноцидот.
Но, други држави, како САД, Велика Британија и Израел, одбиваат да го признаат геноцидот, образложувајќи дека ќе ги влоши нивните односи со Турција.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.