Во пресрет на последниот натпревар од групната фаза во Лигата на шампионите против Динамо Синара, ЖРК Вардар се осврна на натпреварот, шансите калкулациите и пласманот во четвртфиналето.
В Сабота во СЦ „Јане Сандански“ гостува екипа која во првиот меч го надигра македонскиот шампион со високи осум голови разлика. Сепак вардарки веќе го осигураа местото кое води во следната рунда, но од последниот натпревар се зависи на кое место ќе заврши. Опциите се дури три, од второто место во групата па се до четвртото.
Тренерот Индира Кастратовиќ напомена дека Динамо е сериозен колектив и дека калкулациите се тргнати на страна, и дека мора да се влезе во натпреварот со единствена цел победа, па во зависност од текот може да се размислува и за калкулациите.
– Знаеме дека пред нас е исклучително важен натпревар. Многу луѓе прашуваат за калкулации, но ние сме тим што не сака да калкулира. Мораме да победиме, да стигнеме до посакуванитне бодови, а потоа ќе видиме кое место ќе го освоиме во групата. Најважно е да триумфираме, а потоа ќе видиме со колкава разлика. Би сакала да ги замолам навивачите да дојдат во што поголем број за да ни дадат поддршка на овој најважен меч за нас сезонава – истакна Кастратовиќ.
Една од позабалежителните играчки во составот оваа сезона е црногорската репрезентативка Јованка Радичевиќ која истакна таа и нејзините колешки сакаат да покажат кој е „газда“ во оваа сала и секако победата е единствената опција.
– Во нашите мисли е само победа и ништо друго. Сакаме да му се реваншираме на Динамо за високиот пораз минатиот месец. Сигурна сум дека ќе одиграме многу подобро отколку во Русија и имаме квалитет за да славиме над сериозниот противник. Динамо има исклучително квалитетни бекови, исто така и крила. Сакаме навивачите да уживаат во нашето издание, гледајќи не како даваме се во дресот на Вардар. Треба од почеток да покажеме кој е кој, а Динамо е тимот што треба да се плаши од нас“ – изјави Радичевиќ.
Натпреварот се игра в сабота со почеток од 19 часот.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
