Шампинскиот поход на Мајами во НБА не запира, а жешките момци ја забележаа и 22. победа едноподруго, со успешен настап во Торонто. Хит победи со 108-91 и сега го дели со Хјустон втората најуспешна низа од победи во историјата на Лигата. Ракетите од генерацијата 2007/08 имаа идентична серија успеси, а им ја сопре следниот противник на Мајами, Бостон Селтикс. Тој меч ќе биде во епицентарот на вниманието на симпатизерите на НБА, а се игра утре во Бостон. Келтите се опасен противник и имаат низа од 11 победи во легендарната арена „Бостон гарден“. Таму ќе се кршат копјата и тоа е вистински предизвик за актуелниот шампион Мајами, дали има сили за подвиг и атак на неверојатната серија на Лос Анџелес лејкерс од 1970/71. Тој тим од златната генарација на „езерџиите“ несопирливо газеше до 33 победи во низа, што е апсолутен рекорд во НБА.
– Сега доаѓа на ред она вистинското. Ние сме на победничката патека и не мислиме да застанеме. Најважно е што дотука стасавме со суператмосфера во тимот и со колективна игра – рече Леброн Џејмс. Тој е движечката сила на Мајами, а игра неверојатно добра кошарка. Против Торонто забележи 22 поени и 12 скока, што му е рекорден, 32. дабл-дабл ефект во иста сезона.
Двејн Вејд даде 24 поени со 9 асистенции, а третата олстар-ѕвезда на Мајами, Крис Бош, го заврши мечот со 18 поени. Можно е работата во Бостон да им ја олесни повредата на Кевин Гарнет, кој многу значи за најтрофејниот тим во историјата на НБА.
Сезонава Мајами и Бостон играа двапати и резултатот е израмнет, 1-1. Во првиот меч Мајами славеше дома со 120-107, а потоа Бостон се реваншираше со триумф од 100-98, во натпревар со две продолженија. Тие беа тимот што пред 5 сезони го сопре победничкиот поход на Хјустон рокитс.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
