Пратеничката група на ВМРО-ДПМНЕ денеска најави поддршка на предложените измени и дополнувања на Законот за електронски комуникации со кои се предвидува намалување на цените на роаминг-услугите во јавните мобилни комуникациски мрежи. Законските измени се на дневен ред на 25-тата седница на Собранието на Република Македонија закажана за 15 овој месец.
Измените следат по потпишувањето на Спогодбата за намалување на цените на услугите во роаминг во јавните комуникациски мрежи помеѓу Македонија, Босна и Херцеговина, Црна Гора и Република Србија. Со Спогодбата е утврдено земјите потписнички да направат соодветни измени во своите закони за електронски комуникации на начин што цените за услугите во роаминг во државите потписнички на оваа Спогодба ќе се регулираат врз реципрочна основа во согласност со Уредбата за роаминг внатре во Европската Унија.
Според Драган Данев, пратеник од ВМРО-ДПМНЕ, во Законот се додава нов член преку кој се дава право на Агенцијата за електронски комуникации на операторите кои поседуваат јавни мобилни комуникациски мрежи и обезбедуваат јавни мобилни комуникациски услуги да им утврди максимални цени на услугите кои ги нудат во роаминг на корисниците од земјите со кои Македонија ја потпиша Спогодбата.
– Како пратеници од пратеничката група на ВМРО-ДПМНЕ ќе ги поддржиме овие измени и дополнување бидејќи сметаме дека на овој начин македонските граѓани полесно и поевтино ќе можат да ги користат услугите кои ги нудат јавните мобилни комуникациски мрежи преку роаминг во земјите кои што се потписнички на оваа спогодба, рече Данев.
Тој истакна дека очекуваат најголем бенефит да почувствуваат македонските граѓани кои секојдневно патуваат или пак комуницираат со граѓаните од Босна и Херцеговина, Црна Гора и Република Србија, со што се овозможува да ги користат услугите кои ги нудат јавните мобилни комуникациски мрежи во роаминг по многу пониска цена. Преку намалувањето на цените на услугите во роаминг огромни придобивки и еден вид олеснителна околност ќе имаат и македонските компании од приватниот сектор кои имаат секојдневна комуникација и соработка со голем број компании од земјите потписнички на оваа спогодба, наведе Данев.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
