Во завршна фаза на реализација е проектот за конзервација и презентација на откриените структури од ранохристијанската базилика на локалитетот Манчевци во Охрид, информираат од Министерството за култура.
Според планираните активности, до крајот на годинава ќе бидат целосно завршени конзервацијата и илуминацијата, со што ќе биде промовирана уште една значајна културно-историска позиција во старото охридско јадро, во непосредна близина на црквата „Св. Софија“.
Проектотот се одвива во континуитет, четврта година по ред, со финансиска поддршка од Министерството за култура на Република Македонија, а реализацијата на планираните активности ја спроведува Заводот за заштита на спомениците на културата и музеј – Охрид.
Во периодот од 2011 година до 2013 година е извршена заштита од обронување на земјените профили со изведба на потпорни ѕидови и нивно обложување. Истовремено беа консолидирани зачуваните структури од базиликата над кои беа изведени стреи од просторни решетки, покриени со транспарентни акрилни плочи.
Со археолошките истражувања во 2007 година беа откриени делови од северниот и од централниот кораб на ранохристијанската базилика со зачуван поден мозаик со декоративен аранжман карактеристичен за V и VI век. Како особено значајно се издвојува мозаичното поле со донаторски натпис во кој се спомнуваат Тома и Јован кои го изградиле објектот. Исто така, беа откриени фрагменти од фрескоживопис во долните партии на ѕидовите.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
