Соучениците од медицинското училиште палат свеќи за младиот Ангел

Тие на овој начин се простија од матурантот со кого пред само четири денови ја прославиле матурата.

– Трагичната вест за смртта на матурантот Ангел Петковски ја примивме многу тешко. Утеха нема и се надеваме дека вакви работи нема да се случуваат во иднина. Ангел беше трудољубиво дете и иако доаѓаше од Скопје, беше редовен и на наставата и на практиката, а, како што велат неговите соученици, тој им беше и рамо за плачење. Во четвртокот заеднички ја прославивме матурата, се видовме и со неговите родители, кои дојдо да го испратат, но тоа беше последното убаво нешто што се случи со нашиот Ангел – изјави класната раководителка Сребра Цветковска.

За неговата професорка Душица Поповска, која во прва и во втора година му била класна раководителка, убиството на Ангел е голема трагедија и нема зборови со кои може да се опише тагата.

– Пред да замине Ангел ја прославиме нашата матура, која ќе ја памтиме засекогаш. Тој ја согледуваше неправдата и се обидуваше да ја искорени. Момчето беше ретко несебично. Илјадници свеќи ќе горат за тебе ангелу наш и илјадници солзи ќе се пролеат бидејќи сите тагуваме. Горди сме што некогаш сме те имале бидејќи ти беше нашиот другар за утеха. Засекогаш ќе останеш во нашите срца и ние никогаш нема да те заборавиме – рече неговата соученичка Анета Јовановска.