Ставрески: Ќе го вратиме сјајот на стариот струмички театар

– Почнаа активностите за враќање на сјајот на струмичкиот театар, којшто беше опожарен во 2001 година – најавија денеска во Струмица носителот на кандидатската листа за пратеници на ВМРО-ДПМНЕ во четвртата изборна единица, Зоран Ставрески, и министерката за култура Елизабета Канческа-Милевска.

– Ова место во следниот период ќе биде вистинско градилиште и тука ќе никне стариот струмички театар, ќе ја вратиме душата на градот Струмица во делот на културата, да биде гордост за сите струмичании кои сакаат да одат во театар, и кои сакаат да имаат културен живот, да имаат едно прекрасно катче каде што ќе можат да следат театарски претстави, а и за театарските работници да можат да го извршуваат она што најдобро знаат, театарските претстави во една достојна средина – нагласи Ставрески по денешната посета на градилиштето предвидено за изградба на струмичкиот театар.

За овој проект се издвоени 220 милиони денари, средства обезбедени од Министерството за култура.

Канческа-Милеска истакна дека оваа влада на чело со Никола Груевски како никоја досега инвестира во културата, уметноста и во културното наследство и дека таквите инвестиции ќе продолжат и во иднина.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.