10 000 Курди во Стразбур бараа ослободување на Очалан

Околу 10.000 Курди демонстрираа по улиците на Стразбур, барајќи Турција да го ослободи лидерот на Курдската работничка партија (ПКК), Абдула Оџалан, кој на турскиот остров Имрали ја издржува доживотната затворска казна и бараа „правда“ по убиството во Париз на трите курдски активистки.

За протестот се собраа курдите од неколку земји од Европа, Германија, Франција, Белгија, Холандија, Луксембург, носејќи транспаренти со паролите „Слободен Курдистан“ и големи портрети на Оџалан. На чело на протестната поворка одеа десетици жени со бели блузи со ликот на трите курдски активистки, убиени на 9 јануари во информативниот центар на Курдистан во Париз. Демонстрантите носеа транспарент со натписот “Ние сакаме правда, ние сакаме отчет“.

-Ние немама веќе доверба во француските власти, бидејќи месец и половина по убиството се уште не се познати нарачателите, не се знае ништо, рече Махмуд Ерол од Културната асоцијација на Месопотамија. Триесетгодишен турски државјанин, кој тврди дека две години е член на ПКК, беше обвинет и уапсен во Париз во врска со убиството на активистките.

Демонстрантите протестираа, исто така, и против неодамнешното приведување на 17 Курди во Бордо и Тулуз во рамки на истрагата за обиди за рекет во корист на Курдската работничка партија (ПКК). „Ослободете ги курдските политички затвореници во Франција“, беше напишано на транспарент што го носеа демонстрантите. Курдите во Европа вообичаено секоја година организираат масовни демонтрации во Стразбур во средината на февруари по повод годишнината од апсењето на Оџалан, што се случи на 15 февруари 1999 година.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.