Четвртото извлекување за наградната игра „Фискална во рака, награда без мака“ ќе се реализира вечерва во 20 часот на првата програма на Македонската радио-телевизија.
Државна лотарија на Македонија соопшти дека во ова коло ќе бидат извлечени еден автомобил „пежо 208“, 30 вредносни ваучери од 3.000 до 60.000 денари и 120 вредносни ваучери за прехранбени продукти во вредност од по 1.000 денари.
Во извлекувањето учествуваат сите коверти испратени за четвртото коло со сметки кои се валидни од најран датум, 15 ноември 2013 година. Неизвлечените коверти од ова коло, како и од второто, третото, а понатаму и од петтото и шестото ќе учествуваат во седмото коло за извлекување стан и деловен простор.
За учество во наградната игра треба да се испратат 20 фискални сметки во стандарден бел коверт во кој на посебен лист треба да се наведени основните податоци на испраќачот. Писмата може да се испратат по пошта на адресата бул. „Гоце Делчев“ бр. 8, 1000 Скопје – За наградна игра фискална во рака – награда без мака или да се достават на некои од специјално одредените пунктови на Државната лотарија на Македонија.
Резултатите од четвртото извлекување ќе бидат објавени во четврток, 3 април, во дневниот весник „Вечер“ и на веб-страната www.tvkoha.tv.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
