Погледнете како ќе изгледа старото кино во Кисела Вода

Старото кино во скопската населба Кисела Вода ќе се реконструира и адаптира во нов, мултифункционален објект, најавија денеска министерката за култура Елизабета Канческа-Милевска и градоначалничката на општина Кисела Вода, Билјана Беличанец-Алексиќ.

Новиот Дом на културата ќе се користи како театар со 144 седишта. Просторот ќе има и библиотека, уметнички клуб, кафетерија со галерија, административни канцеларии, како и простории за месната заедница со посебен влез.

Реконструкцијата ќе се реализира со средства од државниот и од Буџетот на локалната самоуправа.

– Кисела Вода е една од најстарите општини. Граѓаните заслужуваат да имаат совршен објект со мултикултурна функција и добра културна понуда во интерес на збогатувањето на културниот живот – истакна Канческа Милевска на прес-конференција.

Предвидено е новиот Дом на културата да биде енергетски ефикасен објект со модерна надворешност. Фасадата ќе биде од композитни алуминиумски панели во три бои, црвена, темно и светлосива. Надворешниот простор ќе биде холтикултурно уреден, а за посетителите ќе бидат обезбедени и паркинг-места.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.