Актерот Зоран Љутков оставката уметнички директор во Драмски театар во Скопје ја објаснува со голема ангажирност во Велешкиот и во Драмски театар и поради тоа проценил дека е време да се повлече од оваа функција.
Тој во моментов игра во вкупно осум претстави во двата театари, ангажиран е околу синхронизациите во сериите, има и приватни проекти на кои сака да им посвети внимание.
– Посебно ми е значаен ангажманот околу Фестивалот на античка драма „Стоби“ и таму би сакал да се посветам уште повеќе – вели Љутков во изјава за „Република“.
Тој во моментов во Драмски театар е дел од екипата која ја подготвува претставата „Живот во тесни чевлички“ на Душан Ковачевиќ.
– Ова претстава е последната која ни беше зацртана во четиригодишната програма која ја создадовме со веќе починатиот директор Бранко Ѓорчев. На еден начин, „Животот во тесни чевлички“ е заокружување на нашата заедничка работа. Со ангажманот во Драмски и во Велешкиот театар, како и со синхронизациите, но и некои приватни проекти навистина имам сѐ помалку време целосно да се посветам на функцијата уметнички директор – вели Љутков, кој повеќе од три години ја извршуваше функцијата уметнички директор.
Љутков не ја отфрла можноста повторно да ја извршува оваа функција.
– Во овој период навистина сум презафатен. Не велам дека веќе никогаш нема да будам никаде уметнички директор. Му благодарам на директорот Роберт Велјановски за досегашната соработка и се надевам дека ќе направи добра одлука во изборот на својот иден соработник – вели Љутков.
Инаку, премиерата на „Животот во тесни чевлички“ се очекува во март. Режисер на претставата е Ненад Витанов, а во неа играт: Драган Спасов-Дац, Ѓокица Лукаревски, Ванчо Петрушевски, Душица Стојановска, Марија Кондовска, Билјана Драгичевиќ-Пројковска и Зоран Љутков.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
