Голем пех за Стивен Стамкос, хокеарот со македонско потекло ја скрши ногата (видео)

Голем пех му се случи на Стивен Стамкос против Бостон бруинс, синоќа, по дуелот со Даги Хамилтон, а според информациите напаѓачот на Тампа Беј лајтнингс ja скрши фибијата, односно коската над скочниот зглоб. Хокеарот на Тампа Беј беше во дуел со одбранбениот играч на домаќините и во обид да даде гол се заби во рамката од голот на Бостон бруинс. Веднаш се фати за десната нога, по што беше јасно дека е повреден. Утринава тој ќе биде опериран, а следи долга пауза.

„За жал повредата е сериозна и очекуваме денеска изутрина Стивен да биде опериран. Се надеваме дека се ќе мине во најдобар ред, а секако дека жалиме што нашиот најдобар стрелец ќе отсуствува подолг период од мразот. Ние ќе бидеме со него и во периодот на операцијата и потоа во текот на оомплетната рехабилитација“, изјави Стив Ајзерман.

Стамкос е прв стрелец во НХЛ, заедно со Сидни Крозби, а двајцата репрезентативци на Канада имаат по 23 поени (се сметаат головите и асистенциите). Сега, по тешката повреда во прашање е доведен и настапот на Стивен за селекцијата на Канада на Зимските олимписки игри во Сочи, следната година.

Таткото на Стамкос потекнува од Македонија, а и самиот тој во неколку прилики потврди дека е горд на своите македонски корени. Во сезоната 2009/10 23-годишниот напаѓач на „молњите“ од Тампа беше прв стрелец во НХЛ со 51 погодок заедно со Крозби од Питсбург пингвинс.

Следниот циклус го почна на импресивен начин со 19 погодоци во истотолку натпревари, а заврши како втор стрелец во најсилната хокеарска лига на светот со 45 погодоци, зад Кори Пери од Анахејм.

Лани повторно беше број 1 по бројот на голови, а постигна фантастични 60 погодоци, со што стана само дваесеттиот хокеар во историјата на НХЛ со 60 или повеќе гола во иста сезона. Тој е меѓу шестмината одбрани во професионалниот хокеј што постигнале над 50 погодоци во една сезона на возраст под 23 години и воедно е и рекордер на Тампа Беј со 60 реализации во еден циклус на натпревари во НХЛ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.