Италијански медиуми: Пандев број 1 во победата на Наполи против Ливорно

Италијанските медиуми со суперлативи ја оценија играта на Горан Пандев во победата на Наполи со 4-0 против Ливорно. Македонскиот репрезентативец го постигна првиот гол, а потоа прекрасно му асистираше на Калјехон за 3-0.

Спортскиот портал „calcionapoli24.it“ го посочи Пандев како главен актер на мечот и му даде највисока оценка 7,5 од сите фудбалери на победничкиот тим.

„Горан постигна гол од топ-класа во четвртата минута. Ударот со лева нога откосо на прв допир е мошне тежок, но не и за Пандев. Македонецот прикажа одлична игра, а интуицијата за фудбал ја презентираше со феноменалната асистенција до Калјехон за предност на Наполи од 3-0. Тој момент ја дефинира убавината на фудбалот“, пишува во анализата на мечот Лука Чирило.

„Супер Пандев“ е насловот на „Газета дело спорт“ во текстот посветен на победата на Наполи од 4-0.

„Горан Пандев со убав гол ја награди колективната игра и акција на Наполи. И повторно го покажа талентот за фудбал со магичната асистенција до Калјехон во 54. минута“, пишуваат новинарите на реномираниот весник.

И „calciomercato.com“ без многу дилеми го прогласи Пандев за играч на мечот на „Сан Паоло“ во Неапол доделувајќи му оценка 7, највисока од сите актери што истрчаа на теренот. 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.