Полицијата ја застрела жената која со едногодишната ќерка во автомобил насилно се обиде да влезе во Белата куќа (видео)

Двајца полицајци се повредени, а жената што го предизвика инцидентот во близина на Капитол хил во Вашингтон е убиена, јавија американските медиуми. Триесет и четиригодишната Миријам Кери, жената за која има сомневања дека сакала со автомобил насилно да влезе во Конгресот и во Белата куќа, беше застрелана од полицијата, а видеоснимка од полициската интервенција беше објавена на „Јутјуб“.

Шефот на полицијата во Вашингтон, Кејти Ланијер, потврди дека жената е мртва, соопштувајќи дека сѐ уште не се познати мотивите за нападот, но дека полицијата смета оти инцидентот не се смета за терористички напад.

Според американската телевизија „Ен-Би-Си“, жената што го предизвика инцидентот боледувала од постпородилна депресија откако минатата година родила девојче. Анонимни официјални лица, пак, информирале дека жената имала „ментални проблеми“.

Таа со голема брзина со автомобил минала неколку семафори на црвено светло и се упатила кон Капитол хил. Таму ја пресретнале полицајци кои го опколиле возилото, но Кери успеала да побегне, по што безбедносните служби употребиле оружје. За време на инцидентот во автомобилот била и нејзината едногодишна ќерка, која не била повредена.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.